Agenda dei poeti 2018

5 settembre 2018

U TEMPU

Camminannu pì nà strata di campagna
vitti nà carusitta,forsi
di nà dicina d’anni
cu li capiddi niuri
intrizzati supra a testa
comu à curuna i nà rigina,
e nà visticedda ianca chi la
cummigghiava finu alla punta di li peti,
unni spuntaunu ddù scarpini russi;

Iera assittata supra nù massu
chi paria misu ddà apposta
pì cù vulia pinsari e ascutari;

U suli, malandrinu, ucchiava
chianu e senza paci
a secunnu lu capricciu di lu ventu
chi paria quasi nù sussurru
tra i rami di n’arbiru granni,
maistusu, chi arrivava
a tuccari l’infinitu;

Chianu, pistannu trifogghi e papaviri
arrivai quasi a tuccari li so’ mani,
e vaddannu chiù vicinu
vitti chi l’uocchi ierunu senza luci
e la vucca, risuluta e senza risu;

Circannu di capìri c’addumannai
u so’nomi e picchì iera ddà tutta sulitta;
Stinniu la manu, chi paria cogghiri
lu munnu tutt’attornu,
e dissi nà cosa chi parìa nà sintenza:

Sugnu lu Tempu, senza Tempu
senza principiu e senza fini,
vaddu, ma nun mi servunu l’uocchi pì vaddari
mentri l’omu chi iavi l’uocchi pì cogghiri
l’umbra dù iornu e di la notti
si scorda di lu cori chi divintau vacanti
di pietà e d’amuri
pi lù frati senza pani
e pi nù picciriddu senza terra;
Iù sugnu cà, ci dugnu lù so’tempu
e poi lu pigghiu, senza appellu
picchi lù munnu è nà rota
chi nun iavi principiu
e nun iavi fini!


Maria Italia Basile – Milazzo (ME)