Agenda dei poeti 2018

16 novembre 2018

LA SCALA

Quand nassom gh’è ona scala,
l’è lì proppi davanti,
cominciomm a andà su,
a partì sèmm in tanti.
Ma topicom on poo,
sèmm bòn no de stà in pé
La mamma la va avanti
e nùmm ghe vèmm adree,
perché se borlom giò,
le la me da la man,
inscì nùmm piangiom no
e… imparom a andà pian.
Poeù ciapom la rincorsa,
fèmm trii basèi per volta,
se sentom di leon,
del mond nùmm semm padron.
De corsa semm al pian,
se fermom on moment
poeù ciapom l’altra rampa
per minga pèrd el temp.
D’on tratt… se fa fadiga,
te manca fina el fiaa,
mi guardi in alt, la scala…
soo nanca dòe rivà.
Me par de fa i bei pass,
ma poeù mi borli giò.
“Oh mamma!
Doe te see?
Perché te vegnet no?”
Ma arriva un’altra man
che la me tira su.
E senti ona vosina,
soo no de doe la vègn,
che la me dis: “Cammina!
Va la che te convien,
và avanti on poo ancamò,
ma va pian pian, corr no!”
Soo nanca chi ha parlà,
ma l’è sicur queidun
Ch’el voeur incoraggià.
“Allora?...Te se fermett?

Per perd el pussee bell?”
Mi scolti la sua vos e foo
....on alter basèll.


Nora Brusamolino – Milano