Agenda dei poeti 2010

19 giugno 2010

ITE EST POESIA

Est su friscu lentore de beranu
Ch’ ischidat s’ingalenadu jardinu,
mudat de lughe vera donzi sinu,
pintandelu cun chintas de manzanu.

Lambriga muda iscurrinde innotzente
surcat ambas trempas e i sas laras,
scrariat cantu pentzas e naras,
lugheschet in sas pergas de sa mente.

Paret s’urtimu isteddu a s’arbeschida
daghì sos rajos s’aera colorint,
astros antigos istudant o morint,
issa ti amentat chi sighit sa vida.

Est che sos tzafos arbos e lizeris,
falande chena presse e chena sonu,
si faghet messazera ‘e tempus bonu
cando bramidu su coro l’aperis.

Amasetzat murrunzos e lamentos
de chi e tristu bivet apartadu,
ponet corazu e briu a s’afartadu,
nicados coros torrande cuntentos.

Cun manos delicadas che pitzinna
ti carinnat e assutat suore,
prapat suferentzias e dolore
a duro, duro ti cantat sa ninna.

Ghiat intro manizu fitianu,
perunu agheju leat alabantzia,
umbras postizas e chena sustantzia
sunt solu bisos chi abarrant lontanu.

Est delicata, oghiada amorosa,
gradessida cumpanza pro bisonzu,
bestinde sos colores de s’atonzu,
zughet isura de zovana isposa.

Lassat sinnos de paghe e libertade,
inditat padros nodidos de fide,
recreat che sos fruttos de sa ide,
cossizat su rispettu e s’onestade.

Cun issa da sa terra leas su olu
mancari de puzones no apas alas,
sunt de lizos e rosas sas iscalas
chi pro sa vida attint gosu e cossolu.


Giovanni Antioco Mura – Ghilarza (OR)