Agenda dei poeti 2008

11 luglio 2008

I ME' NEVOD

Se guardi in gìr, me senti fortùnada,
sònt ona nònna ancamò rispèttada.
I mé nevòd quàand vègnen a cà,
per prìm, l'è la nònna de saludà.
Se setten giò, fànn ona cicciarada
cunten còme l'è andada la giornàda.
Per mì hinn còme i mé fioeù
pensi sèmper ai so cavagnoeù...
Se foo on quaicòss de bòn
vàann a lòr i pussee bòn boccòn.
Ghe doo consìli, gh'ho esperìenza,
e lòr sorrìden, ne fàrien sènza,
capìssi che la gènt, el mònd hinn cambià
ma ona paròla in pù la fa ragionà.
- Me raccomàndi cattì foeùra bràvi tosànn,
passàda la gioentù restèn voeùj i màn!
Coltivì bòn e sàn amicizi,
fioeù de fam'glia sènza vizzì. -
- Nònna stai tranquilla non ti devi preoccupare,
solo le tue amiche porteremo a ballare! -
Fèmm ona bèlla ridada tùtti insèma
sònt esageràda, ma el mònd el trèma.
Mì ghe voeùri on bèn de morì,
i hoo vìst a crèss dì per dì.
Me piàsaria tàanto diventà bisnònna
ingrandìss la famìglia còn amòr a la bòna.
Hoo regalà la mìa vìta a sòn contènta,
l'union, la pàs, l'onestà la cemènta,
bisògna sèmper capì, tasè e vorè bèn
i risultà hinn: che d'amòr el coeùr l'è pièn.
- Nònna sempre così vivace devi restare,
perché alla fin-fine, ti vogliam sposare! -
- Brùtti malnàtt,
gh'avii sèmper voeùja de scherzà. -
Me guardèn sorridènt,
me basèn, per fàss perdonà.


Delfina Barberis Pezzani - Milano