Agenda dei poeti 2008

28 febbraio 2008

LA NÒT LA MIA AMISA NÒT

La nòt l è la mia amisa
lee, la men ten compagnia
lassi perd locuja e brisa
el coo la me pòrta via.

Che bèll vèss in depermì
in del scur de la nòt
conr el coeur che voo a dervì
e ricordà nient, nagòtt.

Desmentegà tutt, tusscòss
disgazzi, pènn e tribuleri
quèll frègg che senti  n di òss
del dì tucc quant i baccaneri.

La nòtt, la luna ed i stèll
el mè mond tutt coloraa
gh è nient de pussee bèll
de lor sont innamoraa.

E quand riessi nò a dormi
me vegnen tanti penser
anca se poeu voo a soffrì
per el mè spirit sincer.

Mì te preghi  lassom mai
resta com mì, amisa mia
consolum de tutti i guai
iutom a mandà via st arlia.

Semper mì te pregaroo
saroo a tì semper devòtt
e tutti i me penser del coo
sarann per tì: amisa nòtt.


Renato Colombo - Vignate (MI)