Agenda dei poeti 2007

30 novembre 2007

QUELLA SALSINN-A VERDE

Quella salsinn-a verde
gustosa e apetitosa
sorvia 'na fiamenghilla
de trofìe o de trenette,
con quello so profummo
ch'o fa collâ a saliva,
e allargase o cheu,
o l'è o pesto zeneize
pestòu into mortâ
ch'o piaxe ben ben a tutti,
a-i vëgi comme a-i zoeni
e a quanti de bon gusto,
trovandose à Zena,
se ferman lì à disnâ.

Scicché ògni forèsto
a-o ritornâ a-o sô Paise
sentindo ancon inte l'äia
quello scì bon ôdô
o veu savei a ricetta
de'n tale bocconetto
pe poei coscì à so votta
gustâlo à casa sô.
Ma no gh'é ninte da fâ!

O baxaicò de Prâ
con l'euio da Rivëa
o sa unî a-o profummo
un tale savô soave
che à Zena solamente
quella salsnn-a verde
davvei se peu gustà.


Italo Tagliamacco - Genova