Agenda dei poeti 2015

19 gennaio 2015

PAMPANA E FUIAZZA

Mamma mea, ete na scemma:
se unchia, se unchia
e allu sole schiatta.
E ci esse? Ieu:
‘na fuiazzeddha tennareddha
te nu culore tuce tuce.
Stau erta susu ll’arbulu
me piju lu primu sole;
e l’urtimu ete meu.
Ieu osci su’ na beddha pampana:
me paparisciu allu sole,
me ddafriscu quando chiove.
Me ‘nfacciu: beddhu! beddhu!
E cci ete quistu?
ci faciane quist’addhi?
Passa la stagione;
me ccorgu
ca picca aggiu vistu
e picca sacciu.
Li uceddhi se ‘mpoggiane,
se cotulisciane e se ‘n de ‘nchianane
a ‘n celu.
Mie lu ientu me move
me sbattariscia, vita me tave.
E comu ggh’è bbanutu se ‘n de vave.
L’addhe pampane comu mie
comu mie ‘n de sapane.
Vabbè! Spettu!
spettu lu ientu ca te mustu ‘ndora
e all’aria te ‘n de porta.
Osci ‘ncete. Ieu su pronta!
Oiu cu bisciu:
oiu cu sacciu:
oiu cu ‘nchianu a ‘n celu puru ieu.
Nchianu? nchianu!
Ulu? Ulu!
Cci ghete bellu!
Quante cose moi visciu;
quante cose moi ‘mparu!
Eh vabbè!
Su ssiccata!
Ci me ‘nteressa a mie ca su fuajazza?
Ulu, ulu!
Ma mo cci sta mme faci, tramontana?
Sta mme giri la capu
cu ‘sta giostra te fuiazze!
Cci ghe ‘sta cosa?
Scindu? Scindu, scindu!
A ‘n terra? A ‘nterra, a ‘n terra!
Eh, no! Eh no!
Intra st’acqua suzza,
no!!


Silvana Mottura - Lecco