Agenda dei poeti 2017

27 agosto 2017

CANDO MANCAS TUE

Mi lassas solu.
Neula cazada, nues nieddas,
ispintas dae isbentuliadas
ingurtint onzi cosa.
Seo in pampeos,
chena terra né chelu.
Umbras fertuitas,
lamentos de feras.
Buiu, assichidu,
lizant boghe,
fide e isperantzia.
Paraulas non sonant,
non serbint, nemos iscurtat.
Pentzo, ispeto, mudentzia,
solu sumuzos chi assustrant.
Ti crico cun disisperu
in s’intragna inue, cuada,
mi pigas in ziru.
Erredinde, presumia
lassas ue ti fusti amatada.
Prodizu, torrant
lughe, chelu, terra, vida.
Faeddos, versos, rimas bessint
dae coro e da laras
comente fozas de orrosas.
Bentos atonzinos,
mi zughent in bolu.
Frores, matas, rios, funtanas
cantant, allirgant logos e pessones,
cossolant terra abruschiada,
assutada dae sole e sicagna.
Nepida si isfaet, nues passizeras
batint s’abba disizada.
Totu froris, poesia.
Inue ses tue,
sos omines s’istimant.


Giovanni Antioco Mura - Ghilarza (OR)