Agenda dei poeti 2014

30 dicembre 2014

LA LAMPEDA A ÒLI

Taccada per ari cont on rampin,
la veggia lampeda,
-che, con la soa lus smòrta
la dava de sera
dignità a la vita…-,
la brontola de vess nettada.

Gran volontà, òli de gombet
per nettagh via 'l vonc,
per sgurà e fagh tornà indree
el sò splendor d'on temp passaa.
Con decision mì sfreghi el coverciell
e …on profumm delicaa
el me rapiss.
In del me coo s'gigòtten penser fiss
per tutt'i ròbb seri pensaa
e mai portaa a cà.
L'è come…nse 'na vos:
"Esprimm on desideri….!"

On moment dòpo,
el delicaa profumm
el senti pù!......
Seguiti a impegamm a nettà
el covercell, canna , groppin
caminett, manegh, cadenell,
ferrett de stoppin, parafumm
becchin, botton
vas e mojettina, ……
ma del profumm,
pù nient! Nanca 'n ciccin.

Che magica sensazion!
On peccaa! El saria staa …
on "aiutin".
Fantasii d'on moment…
Però, a furia de nettà
almanch la lampeda,
l'è lì... la par noeuva de pacca
… a sbarlusì.


Alberico Contursi 'Bico' - Milano