Carrello Login

Agenda dei poeti 2014

21 marzo 2014

PRIMAVERA IN SUL CARTELL

Dervi la finestra stamattina
me carezza on’aria remondina
gh’è rivaa finalment primavera
ven pròppi voeuja de andà in stondera.

Anca incoeu l’è lì sul canton col sò can
e ‘l cartell con sù scritt “cieco” in di man
el saludi, ghe doo cinquanta ghei
ma ‘l cappell l’è squas voeui, gh’è domà quei.

Passen via tutti con disinteress
sont in confidenza, ghe ciami el permess
giri el cartell, ghe scrivi sù ‘na fras
gh’el metti in man, voo via col coeur in pas.

Ghe passi arent quand torni indree a bassora
ghe doo ‘n’oggiada, el cappell l’è bell pien
foo finta de nagòtt, me invii vers cà
ma lù el me ferma, hoo faa domà on pass
el cognoss e ‘l sent ben la mia pedana
“Cosa l’è che l’ha scritt?”, el voeur savè...

“INCOEU L’ È PRIMAVERA
MA MÌ PÒDI NÒ VEDELLA”.


Gianmaria Ferrari - Saronno (VA)