Agenda dei poeti 2014

10 febbraio 2014

LETTERA DA MR. HYDE

Vivevi dent de tì, quiett, indorment:
on mal lugaa, ma pront a fà bordell
Mettom al mond, t’hee vist?
Gh’è vorsuu nient
l’è staa assee ravanà nel tò cervell

per cattà foeura el mej de la toa essenza
che la brusava sòtta l’innocenza

E damm minga de bev con la pozion
che la tra a l’ari el sangu e che strangola
te seret pront per la trasformazion
ancamò prima de impieniss la gola

E come t’hee piasuu podè fà dagn
e damm la colpa a mì di tò magagn!

Per ògni colp piccaa denter la carna
‘na lusnada in di oeugg tò d'assasin
per ògni sgar streppaa, vosa l’inferna
dent i tò oregg, come on piesè divin

Ma el moster te see tì, che t’hee sconduu
quell che da semper te saria piasuu

Piang, piang, dispéres sora el tò destin
bestèma contra mì, coppa el demòni
Netta l’anima toa sora on brellin
Rimòrs e lacrim. Ciama a testimòni

tutt el ben che t’hee faa, cerca perdon
per vess staa s’ciavo di tò tentazion!

Car el mè dottor Jekill, sta sigur
ch’el Dio di òmen te da l'assoluzion:
digiun e penitanza e i tò pagur
t’je pòdet sotterrà dent on foppon

… Ma tì t’el see, per quant riguarda mì
son minga mòrt, son ‘dree domà a dormì!


Paola Cavanna - Milano