Agenda dei poeti 2011

6 dicembre 2011

‘NA SCORCIA DI VARCA

Sciddìca supra la sita
di ‘n mucca turi di mari
‘n carricu d’ummira
fiddiannu lu scuru…

Na truscia di çiatuni
e di miseria ‘ncasciata
ca trantulìa di friddu
intra na scorcia di varca…

Na carrettata d’occhi
scaddarizzati ‘nta nuttata,
faiddi ca scattiunu
supra na ‘ncùnia di spranza,
scugna lu tempu e lu didiu
p’attraccari ‘n prescia
a praji scanusciuti di rina
‘intrallazzata ppi oru.

E la luna s’ammuccia
affruntusa di taliari
la raggia di lu mari
linzolu ‘ mpagghiazzato
ca s’ammogghia lu çiatu
e li spranzi ‘nzalanuti
pi cummigghiari, a jiornu
‘n-campusantu senza cruci.


Carmela Tuccari – Aci S. Antonio (CT)