Agenda dei poeti 2007

14 gennaio 2007

CIAO TOMMY

L'è finida in manera terribil
come pègg, ma pègg se podeva nò
l'è quaicòss che gh'ha de l'inamissibil
e riessirèmm mai a mandala giò
ma come se pò mazzà on fiolin
"perchè piangeva" sto pòr crapin.
Me l'hann coppaa cont ona badilada
se tratten inscì nanca i can rognos
stà ròba l'andrà mai desmentegada
e ch'el giudizzi sia tanto rigoros
peccaa vèss in 'na società civil
cambiaria volentera sto profil.
Gh'aveva dersètt mes e l'era malaa
con di oggioni grand e tant luminos
anmò stenti a cred a quèll che t'hann faa
forse per el mè anim riligios
ma dèss el sèmm purtròpp te ghe see pù
te seet in ciel tra i bras'c de Gesù.
Sù in Paradis gh'è on angiol noeuv
on angiol biond con di oeugg celèst
che i prìmm pass l'andarà subit a moeuv
almen lì che te faghen tanti fèst
ricordes che i òmen hinn nò tucc inscì
come chi vigliacch che t'hann rapii.
Oramai ghe resta domà de pregà
per tì Tommy piccol angiol biond
purtròpp a gh'èmm nient d'alter de fà
preghèmm per tì, per numm, per tutt el mond
de pregà per tì a saroo mai stracch
ma preghi minga per chi vigliacch.
Anzi speri che gh'abbien de patì
l'è minga assee mandai in galera
voraria mila vit per fai soffrì
per ricambiai a la stèssa manera
soo che l'è minga penser de cristian
ma voraria mì aveghi tra i man.
Ona ròba voeuri vosala ben fòrt
per chì lì ghe voeur la pena de mòrt.


Renato Colombo - Vignate (MI)