Agenda dei poeti 2004

7 dicembre 2004

LA PRIMA DELLA SCALA

A dicember, chì a Milàn,
quand che gh'è nagòtt de mèi,
gh'è restà 'l savor nostràn
della fera di "bèi o bèi".

Se se voeur quaicòss de bèll
gh'è seràda de gran gala
con di òper de cartèll
alla prima della Scala.

On salon e on gran scenàri
con contorna de palchètt
e, in mèzz, on lampedàri
imponent, de grand'effètt.

On sipàri ross-bordò
de velùu tutt sberlùsent
con i cann che piomben giò
sul proscèni a cent a cent.

Dell'orchèstra i sonador
hinn lì pront cont i strùment,
tùtti in ghinghera anca lor,
in attesa del moment

che se leva la bachèta
per taccà con l'overtùr
ona musica perfètta
col succèss quasi sicùr.

I toalètt che intant fann scènna,
quèi del pùblich che gh'è in sala,
dai palchètt ai loggion piènna,
fann spetàcol de gran gala.

Brocàa e sèd d'ogni color,
tùcc modèi de sartorìa,
stòll, giojèi de gran valor:
ona vera sciccherìa!
Quand se smòrza 'l lampedàri
finìss lùsso e vanitàa,
giò in orchèstra i strùment vari
incomincen a sonà.

Ona splendida armonìa
se elèva in della sala
coi cantànt mèi che ghe sìa
per la prima della Scala!

Vincenzo Migliavacca - Milano